champion777 - თოვლში მოძრაობა.

ღრმა თოვლში განსაკუთრებით თანაბრად იმოძრავეთ, დროულად ჩართეთ დაბალი გადაცემა, მოერიდეთ მკვეთრ აჩქარებას და მკვეთრ შენელებას, აგრეთვე საჭის მკვეთრ შემობრუნებას. ავტომობილი ატარეთ გაკვალულ გზაზე და არ გადაუხვიოთ აუცილებლობის გარეშე. თუ გზის მცირე მონაკვეთი დაფარულია ნამქერით, გაიარეთ იგი სიჩქარის მომატებით, მაგრამ არ დაუშვათ „ბუქსაობა". თუ ავტომობილმა „ბუქსაობა" დაიწყო, დაბრუნდით უკან და თავიდან ცადეთ გავლა თქვენ მიერ გაკვალულ გზაზე.

თუ მოძრაობა შეუძლებელია, ნიჩბით გადახვეტეთ გზა. რაც უფრო დიდხანს „აბუქსავებთ" ავტომობილს, მით უფრო ღრმად ჩაეფლობა იგი და გაგიჭირდებათ მისი ამოყვანა. ავტომობილის დაძვრა გაგიადვილდებათ, თუ წამყვანი ბორბლების წინ დაყრით ქვებს, ხის ტოტებს, ბრეზენტის ნაჭრებს და სხვა მკვრივ საგნებს. საერთოდ კი გახსოვდეთ, რომ თუ დიდ მანძილზე მოგიწევთ თოვლიან ან მოყინულ გზაზე მოძრაობა, უმჯობესია გამოიყენოთ ჯაჭვები ან კოტებიანი საბურავები.